Askar ka tirsan ciidamada Puntland oo lagu dillay qarax miino

by admin | Friday, Dec 12, 2014

GalalGalala :HN :–Wararka naga soo gaaaraya gobolka Bari ayaa sheegaya in saddex askari oo ka tirsanaa ciidamada Puntland ee fadhigoodu yahay buuraleyda Golis ayaa la xaqiijiyey inay ku geeriyoodeen afar kalena dhaawac ayaa kasoo gaarey qarax duhurnimadii maanta ka dhacay meel u dhow tuulada Galgala.

Wararku waxaa ay sheegayaan in qaraxu uu ka dhashay miino kuwa dhulka lagu aaso, waxaana marka laga soo tago askarta dhimatay kuwa ku dhaawacmay loo qaaday goobaha caafimaadka.

Mas’uuliyiinta laamaha amniga Putland way ka gaabsadeen inay weerarkaas ka hadlaan, sidoo kale ma jirto cid ilaa iyo hadda mas’uuliyadda qaraxaas sheegatay.

Al-shabaab oo marar badan iyaga iyo ciidamada ammaanka Putland dagaallo khasaare  dhaliyey ku dhex mareen buuraleyda Golis ayaa horay u sheegatay mas’uuliyadda qaraxyo caynkan oo kale ahaa.

Weerarkani wuxuu noqonaya kii ugu horreeyey ee khasaare geysta ee  halkaas ka dhaca laga soo bilaabo markii ciidamada Putland bishii October ee lasoo dhaafay Al-shabaab kala wareegeen fariisimii ay ku lahayd tuulada Galgala iyo deegaanada hoos taga.

December 2, 2014 markaasoo Madaxweynaha Puntland Cabdiweli Gaas iyo wafdi uu hogaaminayaa booqdeen fariisimaha ciidamada ee Galgala, waxaa lagu soo duqeeyey rasaasta hoobiyaha inkastoo aysan wax khasaare ah geysan kuna dhacday meel xoogaa u jirta goobta wafdigu xilligaas ku sugnaa.

Hiiraan Net.

 

Hiiraan Net

Webmaster@hiiraannet.com

Hiiraannet@hotmail.com

Hiiraannet@gmail.com

Like it? Share it!