Gabaygii 12aad ”Sahan”ee Silsilada Sallaamaley‏

by admin | Saturday, Apr 21, 2012

Gabaygii Sahan 12aad ee Silsilada Sallaamaley

Abwaan Bashiir C/raxmaan Diiriye (Quule)

Marka hore waxaan salaamyaa , abwaankii bilaabay Silsiladaan cusub Sallaamaley Abwaan Xasan Faarax (xasandaaci ) iyo dhamaan Abwaaniinadii ka qayb qaadatay , sida AbwaAn Khaliif Faarax Xayir , Abwaan Cabdiraxiin Hilowle galayr . Isku xiraha Silsilada iyo Kaydiyaha Abwaan Bashiir XIrsi iyo dhamaan abwaanadii kaloo ka qayb qaatay waxaan jeclaan lahaa inaan halkaan ku soo bandhigo tix kooban oo aan ugu tala galay Silsiladaa inaan kaga qayb qaAto tixdaas oo mageceeda layiraahdo (Sahan) waxaana ka cudur -daaranayaa hadii ay ku jiraan ama cid taabanaya in la iga raali ahaado waxaanan isku dayayaa waxii i seega maahee inaan ilaaliyo xeerka iyo xuquuqda Silsilada iyo gebi ahaan suugaantaba Haddana waa kan Gabaygii ee ka bogasho wacan :

1. Siinlayda gabay waayadaan ,waan ka saahidaye

2. Ma samaynin maansooyinkaan, saaxi ku ahaaye

3. Sugaanta kuma aannan larin, sadaradaydiiye

4. Annigoo ka soomay mar kale, igu sallaameene

5. Aan sifeeyo waataad in badan, iga sugayseene

6. Sooyaalka taariikhdu waa ,surin la raacaaye

7. Sinjigiyo waxaa lagu bartaa ,suuradii hore e

8. Sax waxaad u baran meesha aad ,sal u lahaydeene

9. Sugaana waxaa lagu bartaa ,seerihii lumaye

10. Sammaantiyo xumaantay mar qura, kala sifaysaaye

11. Socod waxay ku gaadhaa halkaan, soofku marahayne

12. Samaan iyo xumaan wixii jiray, sax u abaartaaye

13. Mar bay samaha kaa caawisaa ,amase sooyaalka

14. Marna seed xun bay kugu ridaa ,ama sun meel taale

15. Seedaamo doogliyo marbay, nabada soohdaaye

16. Marna suluf colaadeed ayey, sahay uqaadaaye

17. Habda waa sidii loo dhigay ,sax u abaaraaye

18. Surinkaad u qaaday murtidu, kuula socotaaye

19. Nin waliba safkuu galo ayaa, laga su`aalaaye

20. Anna taydu waa sammaha iyo, eray sokeeyaade

21. Afartaa murdida socota iyo ,sawdka maansada dheh

22. Sifahaan ka geeraaro iyo ,sadaradaydii dheh

23. Afar kalana waa sahanka guud ,midaan ku saadashay

24. Sallaamaley murtida loo baxshee .socotay waagaanba

25. Saxan saxa udgoonay midaan, nabada saadaalin

26. Saaxiibadaydiyo ragii , saafay miraheeda

27. Seemaalka guud iyo naxwuhu, waa mid saafiya e

28. Hadii aan sarbeeb hoose jirin, soofku waa nabade

29. Sidaan urko maansada hadaan, anigu saadaasho

30. Sabaankii lasoo maray wixii ,shacabka saameeyey

31. Sakhmigii ka dhacay nooradkiyo ,soodka badidiisa

32. Kala soocankii dhacay markay ,taladu seerawday

33. Sabi iyo dhalaankii wixii ,seefa lagu boobay

34. Saakaba kanooline waxaan, subax usoo joognay

35. Inaan samiro mooyee si kale ,saaka may laha e

36. Hadii qaranka soomaaliyeed uu ,saldhigan waayey

37. Sodan sano iyo dheeraad haday ,socotay luubaantu

38. Nin waliba siduu rabo haduu, saca u maaalaayo

39. Sirtuu rabay shisheeyuhu haday ,sahal ku gaareene

40. Nin waliba salaan gaara baa ,lagu salaamaaye

41. Annigaa ku saacidahayee, soo dag bay orane

42. Adaan kula socdaa iyo sirbay ,kugu la meeraane

43. Sinji guurku aayaha danbay buu, saxal ku beeraaye

44. Ma sir yara ajaaniib hadaad ,sahashanaysaane

45. Sawdkaad ka garan sheekaday ,nagu sameeyeene

46. Soomaali waynay waqtiga ,waad lasocotaane

47. Halo saxo wixii kala dhexgalay ,labadan soomaali

48. Seeraha gumaystuhu dhigiyo ,sumadan waa beene

49. Sokeeyuhu makala maarmi karo ,suur kastoo dhaca e

50. Seddexda iga maqan baan rabaa ,inaa sal gaaraaye

51. Somaalidoo kala go,daa ,waa suaal adage!

52. Sidaa ma ahan kala guuristiyo ,seetadaan furane

53. Safar aan qorshaysnay bulshadu, way ku salshaaye

54. Soco tadu waxay qaadataa ,sahay ay quutaane

55. Sibraar caano geel iyo biyey, garabka saartaane

56. Adigoon salaameyn kuwaad ,sabad wadaagteenba

57. Adigoon u sababayn halkaad, uga sadcaalayso

58. Saxdu maahan inaad uun dhahdaa ,waan safrahayaaye

59. Sahan baa umaqan reerahoo ,saadanbay dagine

60. Sarac meel leh oo doogle baa ,suuban loo rarine

61. Inta qaranki soomaaliyeed, sax u imaanaayo

62. Saadaashu way wacan tehee, suga ayaan kooban

Waxaa Tiriyey

A bwaan Bashiir C/raxmaan Diiriye (Quule)

Quule252@hotmail.com

Fadlan waxii talo iyo Tusaale ah ee Silsiladan ku saabsan iyo ka qaybqaadashadeedaba waxaan kala xidhiidhi kartaa addigoo mahadsan

Ab Xasan Faarax Abiib (xasandaaci) daaci77@hotmail.com

Cabdiraxiin Hilowle Galayr galayr1977@hotmail.com

Bashir M. Hersi brdiraac@hotmail.com

Hiiraan Net

Webmaster@hiiraannet.com

Hiiraannet@hotmail.com

Hiiraannet@gmail.com

Like it? Share it!