Hay’adda CCD oo kulan u qabtay maamulka iyo waxgaradka gobollka Sh/dhexe

by Somali | Wednesday, Mar 6, 2013 | 30 views

dhaqan-ka-2Jowhar : HN :– Kulan ballaaran oo uu soo qaban qaabiyay Hey’adda Wada hadalka Bulshada oo ay ka qeyb galeen Maamulka Gobolka Shabellaha Dhexe, Saraakiisha Ciidamada xooga dalka iyo Odayaasha dhaqanka ee heer deegaan ayaa maanta ka dhacay magaalada Jowhar ee Xarunta Gobolka Shabellaha Dhexe.

Kulankan oo looga hadlayay sida dhalinyarada looga wacyi gelin karo in aysan dhalinyarada ku biirin Al-Shabaab, isla markaana aysan qaadan fikradaha qaldan ayaa waxaa Khudbado ka jeediyay mas’uuliyiinta ugu sareysa Maamulka Gobolka Shabellaha Dhexe, saraakiisha iyo Odayaasha dhaqanka.

Gudoomiyaha Gobolka Shabellaha Dhexe Cabdi Jiinow Calasow oo ugu horeyn furay kulanka ayaa ku ammaanay Hey’adda CCD sida ay uga shaqeyso isu keenida bulshada iyo la shaqeynta maamulada dowliga ah, isagoo tilmaamay in fadhigan loogu tala galay in bulshada lagu wacyi geliyo, si looga shaqeynta nabadgelyada.

“Waxaan uga mahadcelineynaa Hey’adda CCD wada shaqeynta maamulada, isu keenida bulshada iyo wacyi gelinteeda, waxay tani ka qeyb qaadaneysa in bulshada aayaheeda ka tashato, nabadeedana ay ilaashato”ayuu yiri Cabdi Jiinow Calasow.

Gudoomiye Cabdi Jiinow ayaa sheegay in looga baahan yahay bulshada inay ammaanka kala shaqeeyaan maamulka iyo ciidamada, isagoo tilmaamay in xoreynta Gobolka Shabellaha Dhexe ay bilaabatay 26-kii June ee sanadkii hore, isla markaana sagaal bilood laga joogo, waxaana uu cadeeyay in gobolka aanu la mid aheyn gobolada kale, maadaama dadkiisa, maamulkiisa iyo ciidankaba ay wada shaqeyn ka dhaxeyso.

Gudoomiye Cabdi Jiinow ayaa ugu baaqay odayaasha dhaqanka inay iskaashi joogta ah la sameeyaan maamulka, si nabadgelyada looga shaqeeyo, waxaana uu ku tilmaamay odayaasha dhaqanka inay yihiin Ahlul Xal Wal Caqdi, isla markaana umada masiirkooda ka shaqeeyaan, waxaana uu intaa ku daray in dhowaan Gobolka Shabellaha Dhexe uu casuumi doono ergooyin ka kala socda beelaha gobolka si ay hogaan u soo doortaan, isagoo iftimiiyay doorka dowladda uu yahay inay Sistem Federaal ah iyo xuquuqda laga rabo inay hirgeliso.

Sidoo kale Gudoomiyaha degmada Jowhar Maxamed Amiin Cusmaan Caqiil oo kulanka ka hadlay ayaa sheegay in Odayaasha dhaqanka ay si joogta ah u wada shaqeeyaan, isla markaana ay ka qeyb qaataan nabadgelyada, waxaana uu balan qaaday inuu sii soconayo xiriirka iyo wada shaqeynta.

Taliyaha Guutada koowaad ee ciidamada xooga dalka Jen. Maxamed Maxamuud Saney oo ka hadlay ayaa sheegay in loo baahan yahay in la iska kaashado adkeynta nabada gelyada, isagoo soo qaatay in odayaasha ay door muuqda ku leeyihiin nabadeynta, waxaana uu ka dhawaajiyay in xoreynta gobolka ay meel wanaagsan mareyso.

Jen. Saney ayaa uga mahadceliyay Hey’adda CCD sida ay uga shaqeyso isku keenida bulshada iyo wacyi gelinteeda, waxaana uu ugu baaqay inay sii wadaan howlaha wacyi gelinta iyo siminaarada, si bulshada loo awoodeeyo, ayna meel uga soo wada jeestaan kooxaha nabad diidka.

Sidoo kale Odayaasha dhaqanka ee goobta ka hadlay oo ay ka mid ahaayeen Nabadoon Cali Ibraahim Beesh, Caaqil Yaxye Maxamed Cali iyo C/fataax Macalin ayaa intuba sheegay in odayaasha dhaqanka diyaar u yihiin inay ka qeyb qaataan nabada, wacyi gelinta dhalinyarada iyo dib u soo nooleynta adeegyadii bur buray ee gobolka, iyagoo soo dhoweeyay kulanka ay u qabatay CCD.

Odayaasha dhaqanka ayaa sheegay inuu farqi weyn u dhaxeeyo shalay iyo maanta, waxayna xuseen inay ka baxeen cabursanaantii iyo kala qeybsanaanti odayaasha, waxaana ay cadeeyeen inay dareemayaan xornimo, isla markaana ka go’an tahay sidii kaalintooda uga qeyb qaadan lahaayeen dadaalada ka socda gobolka ee ku aadan xal u helida khilaafaadka iyo nabada gobolka.

Sidoo kale Gudoomiye kuxigeenka dhinaca Amniga iyo Arrimaha bulshada Xasan Nuur Maxamed Ibraahi oo kulanka soo xiray ayaa sheegay in looga baahan yahay odayaasha dhaqanka inay la shaqeeyaan maamulka, isla markaana waxyaabaha ay ka dhawaaiyeen si ficil u bedelaan, waxaana uu ka codsaday Hey’adda CCD inay sii wado tababarada ceynkan oo kale oo ay u qabaneyso bulshada.

Ugu dambeyn Kulankan ayaa noqonaya kii u horeeyay ee odayaasha dhaqanka loogu qabto magaalada Jowhar, tan iyo markii dowladda la wareegtay, waxaana kulankan uu ka qeyb qaadanaya wacyi gelinta iyo horumarinta bulshada qeybaheeda kala duwan.

–Dhamaad–

Like it? Share it!