Maanso Jiifto ah oo la yiraa: Shardi. W/A:Maxamed Cilmi Dhicisow

by Yahye | Thursday, Jul 19, 2012 | 200 views

Jiiftadan la yiraa: “Shardi” waxay warcelin u tahay jiiftadii Shiinleeyda ahayd ee: “Shurugdiid” ee uu curiyey Bashir M. Hersi. Jiiftadaa oo sawir guud ka bixinaysay marxaladda haatan marayso Soomaaliya, xambaarsanaydna weydiimo ku saaban tagtada, taaganta lagu sugan yahay iyo timaaddada foodda nagu soo haysa. Anoo intaa maanka ku haya, yaan jeclaytan inaan dhawr eray ka dhaho, isku dayo su’aalaha la soo jeediyey jawaabahooda. War iyo dhammaan, aan idiin kala boxo idinka iyo tixda, ee ka bogasha wacan:

 

Silsiladdaan Sha’laydaa
Suugaanta shubantaa
Shurugdiidiyo Shaandhays
Shardi aan ka daba diro
Samahana ku shaaciyo
Ha la showro aan dhaho
Su’aalihi shurdaysnaa
Shakamada ka sii furo
Kuwa shaafka wado iyo
Shiqiyada u sii digo!

Afartaa ma kala shirey
Maw sheegay sharafoo

Ma shirribay raggii hore

Shiinleeyda noo furay

Hadal shaacir maw diray
Runta lagama sheexee
Xaqa lama shaxeexee

Ma ka qaaday shaarkii
Afar kalana iga shuba.

Soomaalidi sharfoonayd
Shacabkii sinnaan jiray
Cudur shaamiyaa helay
Annagoo Shareeciyo
Qeynuunya sharafba leh
Mar baa shabaq naloo dhigay

Iyo shaafta dadabya leh
Shalay iyo dorraatiyo
Sanadooyinkii shubay
Shil baa dhacey shamuumya leh
Dalki baa god shulug yiri
Iyo ceel Shabeella leh
Dil baa dhacey Shahiidya leh
Shar baa timid sharuuba leh
Oday Sheekh ah lama dayn
Shan dhal Naag ah lama dayn
Gabadh Shaash leh lama dayn
Shanya toban jir lama dayn
Saqiir shaaba lama dayn
Wax Shahaata lama dayn
Hays shiidda mooyee
Hays shuuqda mooyee
Hays shuufta mooyee
Hays shabisa mooyee
Hays shirayso mooyee
Hays shabaqdo mooyee
Ha shakaakto mooyee
Hana shoogto mooyee
Shixnad gaasa mooyee
Hays sharafta laga waa
Hays shifayso laga waay
Haysla shoobto laga waay
Haysla showrto laga waay

Kala sheelo mooyee

Kala shiraya mooyee

Shan wejiila mooyee
Hoggaan sharaf leh laga waa!
Xumaha shir wacayoo

Dhibaata shax dhigatoo

Ummadduna shib wada tiri.

Afartaa shilkii dhacey

Maw sheegay shacabkii
Ma shirribay raggii hore

Shiinleeyda noo furay

Hadal shaacir maw diray
Runta lagama sheexee
Xaqa lama shaxeexee

Ma ka qaaday shaarkii
Afar kalana iga shuba.

 

Shaaciyow Diraacow
Sharta kuwi horkici jiray
Haddaad shuuftayoo tiri
Shirar baa socdee joog
Waxaan kuugu shedayaa.

Faalshaha wax sheegee
Shimbiraha adeegshiyo
Kaahinliyo sharrowgiyo
Ka shabaabanow joog
Ka shirqool wadow joog
Ka shiddada hurow joog
Ka shuftada ahow joog
Nabad baa shakuuriye
Xumahaa shareeranoo

Samaa shaal la saariye
Ha shallaayinee jog.

 

Afartaa ma kala shirey
Maw sheegay sharafoo

Ma shirribay raggii hore

Shiinleeyda noo furay

Hadal shaacir maw diray
Runta lagama sheexee
Xaqa lama shaxeexee

Ma ka qaaday shaarkii

Afar kalana iga shuba.

Shurugdiid su’aalihi
Shuruudihi is daba yiil
Jawaab aan ku shaabbado
Shardi aan ku wada furo.

Waxa qaranka shirin kara
Waxa nabad shamili kara
Waxa cudur shifeyn kara

Waxa sharaf hibeyn kara
Waxa shaqaaqa bi’in karo

Wax  hidaha sharrixi kara

Wax shahaado bixin kara
Waxa shaqaale qori karo
Shisheeyeha xayiri kara

Gumeystaha shib  dhihi kara

Shakadaha u xidhi kara

Oo sharkiisa celin kara

Gunta shoobareyn karo

Gobta shaar u gelin karo.

Shaajaca  halyeeyga ah
Sharcigana aqoon u leh

Shareecana dabbiqi kara
Shaabicyahay Imaamkuna
Sida Sayidki shubi jirey
Shucuurtii dadkeeniyo

Shuhadada xorriyaddii

Leegadeenii Sheegnayd
Ama shayb waddaniyiyo
Qaranka u shaqaale ah!
Badda shilama siinayn
Dhirta holac ku shiilayn
Hanti jeeb ku shubanayn
Qolo gaara sheegayn
Shareecada ku Suufiya
Shisheeyaha sheeraroo
Ibliis shaah ka guranayn
Sharna kuu daboolayn
Hammigiisu shiri yahey
Maatada shifee yahey
Shacabkaaga dhawr yahay

Inaan dhiig la shubin yahay
Xumahana Shareer yahay

Qabiil shallow ka tuur yahay

Xaqa kor u shareeryahay.


Afartaa ma kala shirey
Maw sheegay sharafoo

Ma shirribay raggii hore

Shiinleeyda noo furay

Hadal shaacir maw diray
Runta lagama sheexee
Xaqa lama shaxeexee

Ma ka qaaday shaarkii
Afar kalana iga shuba.

 

Sharadkii ma kuu furay

Shandaddii daboollayd

Ma ka qaaday shaashkii

Iyo Shaalkii saarnaa

Shinta hadalka maw dhigay

Ragbaa shaaric jiiraye

Shucaacii ku lumayoo

Hilinkeeda shuufine

Ma shalwiyey halkaan rabay

Hootada shan geesta ah.


Maansada nin sheegtiyo
Nin shahaado haaystiyo
Mid ku shaaribbaystiyo
Shaacirkii gaboobiyo
Shayb iyo shabaabkoow

Kala shiila hadalkoo

Runta sheega weliboo

Shiinleeyda maanta ah

Iyo sheekadaa xidhan

Shawrkaa naloo wacay

Shifa iyo wanaaggeed

Sharciyo hannaankiis

Shiin iyo dhigaalkiis

Sharaf iyo dadnimadeed

Innagoon shallaayeyn

Shishe aan u booyeyn

Shimmee baan la helayaa?

Shaariceena loo mari?

Shushub laga baxaayaa?

Iyo sheegatadan baas

Shaydaanka koorta leh

Duulkan aanan sheexayn?.


Dhammaad.

 

Maxamed Cilmi Dhicisow

Like it? Share it!