Nicholas Kay oo ugu baaqay Galmudug in ay wadda hadal la furaan Puntland iyo Ahlu Sunna

by admin | Friday, Jul 24, 2015

Cadaado : HN :–Danjiraha gaarka ah ee xog-hayaha guud ee QM u qaabilsan Soomaaliya, Nicholas Kay, ayaa soo dhoweeyay caleemasaarka Madaxweynaha Maamulka Galmudug, Cabdikariim Xuseen Guuleed.

Isagoo ka hadlayay xaflad lagu qabtay magaalada Cadaado, Ergeyga Gaarka ah Nicholas Kay wuxuu yiri: “Waxaan u hambalyeynayaa Madaxweyne Cabdikariim Xuseen Guuleed iyo Madaxweyne Ku-Xigeen Maxamed Xaashi Cabdi. Baarlamaanka Galmudug ayaa idiin doortay oo idiinku aaminay inaad qaadaan mas’uuliyad aad u weyn si aad u dhistaan maamulka gobolkan; inaad cadaalad ka xaqiijisaan adeegyada la bixiyo, iyo inaad dadka amniga u sugtaan.”Nick Kay PHOTO

Ergeyga Gaarka ah Nicholas Kay ayaa sidoo kale u hambalyeeyay Dowladda Federaalka Soomaaliya, Guddiga Farsamada, wakiillada beelaha, iyo dhammaan dadka reer Galmudug ee suurtagal ka dhigay xafladdan maanta.

“Waxaan Dowladda Federaalka iyo Maamulka Galmudug ku dhiirigelinayaa inay ku dhaqaaqaan dib u heshiisiin iyo wadatashi, si dhab ahna ugu hawlgalaan xallinta wixii khilaafaad ah ama isafgaranwaa ah ee kala dhexeeya Ahlu Sunna Wal Jamaaca iyagoo u maraya wadahadal iyo wadatashi si loo helo xal waara,” ayuu yiri Ergeyga Gaarka ah Nicholas Kay. “Beesha caalamku waxay diyaar u tahay inay taageerto dadaallada dhexdhexaadinta.”

“Beesha caalamka waxaa ka go’an hirgelinta heshiiskii ay magaalada Garoowe ku kala saxiixdeen Dowladda Federaalka iyo Dowladda Puntland bishii Oktoobar 2014, oo beelaha ku kala nool Puntland iyo Maamulka Ku-Meelgaarka Galmudug u suurtagalinaya inay nabad ku wada noolaadaan.”

“Qaramada Midoobay waxaa ka go’an inay taageero bixiso maadaama aan horey u soconayno, oo idinkuna aad wajahaysaan caqabado cusub. Waddada idinka horeysa ma aha mid xaarxaaran oo wada siman ama mid fudud, laakiin waxaan ku kalsoonahay inaad guuleysan doontaan idinkoo leh adkeysi iyo go’aan adag.

Hiiraan Net.

Hiiraan Net

Webmaster@hiiraannet.com

Hiiraannet@hotmail.com

Hiiraannet@gmail.com

Like it? Share it!