Shariif Xassan oo ka soo horjeestay maamulka looga dhawaaqay gobolka Bakool

by wadani | Saturday, Dec 26, 2015

Baydhabo : HN :– Madaxweynaha maamulka Koonfur galbeed Soomalaiya ayaa ka soo horjeestay maamulka shalay loogaga dhawaaqay degmada Ceelbarde ee loogu magac daray Bakool sare, iyadoo xildhibaano ka tirsan Baarlamaanka Federaalka ay taageerayeen maamulkan lidiga ku ah kan Koofur Galbeed.

Wasiirka Warfaafinta Maamulka Koofur Galbeed Xasan Cabdi Max’ed ayaa sheegay in maamulka looga dhawaaqay Ceelbarde uu yahay mid sharci darro ah, isla markaana aysan marnaba ogolaan doonin.

“Maamulka Ceelbarde looga dhawaaqay waa mid sharci darro ah, Koofur Galbeed maamul ayaa ugu magacaabanshariif-xasan-280x175 Ceelbarde, Guddoomiye ayay leeyihiin, mana ogolaan doonin maamul gacan ku rimis ah in halkaas laga hirgeliyo”ayuu yiri Wasiirka Warfaafinta Koofur Galbeed.

Xildhibaano ka tirsan Baarlamaanka oo ka soo jeeda Ceelbarde iyo deegaano ku dhow xuduuda Itoobiya ayaa la sheegay inay yihiin maskaxdii ka dambeysay maamulkaas, waxaana lagu dhisay tabasho ay ka qabaan Maamulka Koofur Galbeed oo la sheegay in dadkii deegaanadaas ka soo jeeday aan laga qeyb gelin.

Maamulka Bakool Sare ayaa waxaa Madaxweyne loogu doortay Axmed Maxamed Mashruuc, halka Madaxweyne kuxigeen loogu doortay C/llaahi Sahal Nirig.

Xildhibaanada ka qeyb galay munaasabadii loogaga dhawaaqayay Maamulkaas ayaa waxaa ka mid ahaa Xildhibaan C/wahaab Ugaas Xuseen, Xildhibaan Maxamed Aabi, Xildhibaan Sanyare iyo Wasiirkii hore ee Maaliyada Xuseen Cabdi Xalane

Deegaanada maamulka looga dhawaaqay ayaa ku yaalla waqooyiga Gobolka Bakool, gaar ahaan Ceelbarde, Yeed iyo Caato.

Hiiraan Net.

Hiiraan Net

Webmaster@hiiraannet.com

Hiiraannet@hotmail.com

Hiiraannet@gmail.com

Like it? Share it!