Waa sidee xaalada B/weyne kadib imaashiyahii ciidamada Jabuuti. Warbixin

by Yahye | Wednesday, Dec 5, 2012 | 52 views

B/weyne: Waxay ahayd Dec. 2011 waa sanad ka hore markii ciidamada Itoobiya iyo kuwii markaa watay magacii maamulka Dooxada Shabeele aay gacanta ku dhigeen magaalada xarunta u ah gobolka Hiiraan ee B/weyne.

Markii aay ciidamada Itoobiya iyo kuwa Somalidu aay qabsadeen magaalada B/weyne waxaa ka dhacay qaraxyo iyo dilal joogto ah, taasoo markii dambe magaaladu aay gashay bandow joogto ah socodka shacabkuna uu ku soo koobmay saacadaha subaxdii 10,00 ilaa 17,00 iyadoo dadka laga mamnuucay inay socdaan xilagaa wixii ka baxsan.

Bandowga la geliyey magaalada ayaa wuxuu dadka shacabkaa ku noqday dhibaato iyo culaab maadaama ganacsigii iyo isku socodkii uu hakad weyn galay, naftooduna aay mararka qaar halis gasho, waxaase wax badani is bedeleen markii ciidamada ka socday dalka Jabuuti la keenay magaalada B/weyne, ciidmada Jabuuti ayaa iyagu bilaabay inay dadka dhex galaan la sheekeystaan, ciidamadan ayaa xitaa markey adeeganayaan ama biyaha aay dhaansanayaan sameynin wixii looga bartay ciidamada Itoobiya ee ahaa in wadooyinka dhan aay xirtaan wixii dhaqaaqana xoog ku kala kexeeyaan, xitaa bandowgii saarnaa magaalada inkastoo aan si cad loo qaadin hadana dadku weey socdaan xiliyadii bandowgu magaalada saarnaa iyagoon wax baqdin ah qabin.

Ciidamada Jabuuti ayaa dhawaan waxay tababar siiyeen ciidmada deegaanka ah 00 ku dhow 100-askari kuwaas oo si toosa u hoos taga maamulka AMISOM ee aay hormuudka ka yihiin ciidamada dowlada Jabuuti iyo maamulka gobolka, ciidamada la soo tababaray ayaa waxaa la sheegayaa in aay roondo joogto ah ka hayaan magaalada iyadoo la dareemayo in aay leeyihiin akhlaaq wanaagsan iyo dishibiliin, waxaa hada xareysan ciidamo kale oo gaaraya 150 askari hadii ciidamadaa soo dhameystaan tababarka ayaa waxaa la rumeysan yahay in magaalada B/weyne yeelan doonto ciidamo deegaanka oo ku filan lehna tayo iyo tababar.

Dhinaca kale ciidamada Jabuuti iyo maamulka gobolka ayaa waxaa ka dhex jira isfaham weyn, iyadoo mararka qaar aad is leedahay wax u kala soocanba ma jiraan, wadashaqeyntooda ayaana si toosa looga dareemi karaa , ciidamada Jabuuti ayaa sameystay kalsoonida shacabka magaalada B/weyne iyadoo dadku aad u soo dhaweeyeen joogitaankooda magaalada, shacabka qaar ayaa qaba in ciidamada Jabuuti aay uga dhow yihiin kuwa Somalida hadii laga eego hab dhaqanka iyo walaaltinimada.

Waxaa iyadana xusid mudan sidii ciidamada Jabuuti aay uga qeyb qaateen fatahaadii ka dhacday magaalada B/weyne taasoo dad badani ku naf waayeen kuwo kalana ku hanti iyo hooy beeleen, iyagoo macaawino intii tabartooda ka geystay.

Ciidamada walaalaha Jabuuti ayaa amaan iyo bogaadin badan looga hayaa magaalada B/weyne ee gobolka Hiiraan, waxaana xaqiiqa haadii Jabuuti awood u lahaan lahayd in wadanka oo dhan ka howlgasho aay Somaliya dhaqso cago dhigan lahayd.

C/casiis Cali Kadeed

Hiiraan Net

Like it? Share it!